性格決定投資方法

幾年嚟，我唔覺唔覺買左好多本書，搞到嗰書櫃都差唔多裝滿曬。啱啱嗰禮拜六，自己就趁得閒執下嗰書櫃，點知喺嗰「書海」到俾我揾到一本陳年舊書《男女大不同》，呢本書係由約翰葛瑞(John Gray) 所寫，內容主要係講男女之間性格上嘅差異，同埋彼此應有嘅相處方式。

人嘅性格，無論係天生定係受後天環境所影響，可以肯定嘅係，性格會影響行為，當然包括投資買賣決定啦。講起投資，好多人第一個諗法都係男仕會佔優，因為男仕一般頭腦夠泠靜、心思又夠細密喎，肯定叻過女仕啦。點知嗰實際情況完全相反，美國曾經有研究指出，女性嘅投資回報率，平均比男性高出1.4%。最主要原因係因為男仕一般比較固執、要「Face」、冇耐性同埋好賭。呢D特質，全部都係男仕嘅死穴，亦都係投資嘅致命傷。好多時當某間公司出左問題，股價係咁跌，男仕或者會為咗「Face」問題，再加埋天生嗰種好勝嘅心，死都唔肯止蝕，要等到股價跌到殘哂，先至會把心一橫將佢賣左。

對於男仕呢種諗法，女仕顯然冇呢個包袱，就正正係因為女仕唔逞強嘅性格，令佢地嘅賺錢比率相對提高。而且女仕可能天生鍾意Shopping，平時都會習慣格價，佢地對價格嘅敏感度一般會較高。

話雖如此，女仕係股市中都唔係無缺點。好多女仕天生較為細胆，喺大升市之中可能好早就賣曬D股票，錯失大賺嘅機會。總括嚟講，投資係個人性格嘅延伸，無論男仕定係女仕，都要清楚了解自己的性格缺點，好好控制自己嘅情緒，咁先可以在股海中克敵制勝。