超市微利 舖租定輸贏

上星期二，因為唔使返學校嘅關係，我就趁得閒陪阿媽到藥房同超市「上倉」。去到藥房，阿媽即刻出手掃貨，佢話無論面膜、廁紙或者洗頭水等日用品，藥房都平過兩大超市一大截。照正常計，兩大超市嘅議價能力應該大大高過藥房，但喺點解藥賣嘢平咁多? 原因其實好簡單，藥房好可能係用蝕本價賣日用品博取客人青睞，等客人買吓買吓，唔覺唔覺買埋D高毛利率嘅成藥，Total計埋都可以賺番少少。不過，藥房咁做都有風險嫁，如果遇到我阿媽呢挺精明師奶，齋買日用品，佢就會攞唔到著數，好可能仲要倒蝕番轉頭。

其實超市都經常用呢招，不過割價傾銷的成本，通常都會透過加上架費去轉嫁俾供應商。始終超市掌握住控制權，大不了唔俾供應商D貨上架，咁供應商實死無生，所以正常嚟講只能妥協。為左呢個問題，阿媽都同我呻過好多次，因為佢正職係美國一間大型日用品公司的採購員，經常都要同超市傾數，睇下D上架費可唔可以平番D。

照咁睇，超市咪「賺到笑」? 咁大家又諗得太過簡單，超市都有弱點嫁，就喺佢地嘅邊際利潤極低，同埋嗰舖面面積一般較大，假如業主加租，隨時由賺變蝕。兩大超市至所以屹立不倒，某程度上係因為佢地D舖唔使擔心加租，母公司都係經營地產，包保唔會隨便加租。近年嚟，內地都有幾間超市企業係香港上市，大家如果有興趣投資嘅話，不妨睇下邊間企業係自己買地起舖，相信佢地未來發展應該較有優勢。