睇實細節 早悉危機

上星期五，杜拜世界（Dubai World）財困嘅消息震驚全球，恒指單日都跌咗成千點，搞到唔少投資者一額冷汗。當日又有唔少人高呼「黑天鵝事件」，將今次杜拜世界可能違約嘅事件同舊年雷曼破產件事相比，因為今次都係突如其來，而且仲有機會觸發環球金融危機，導致股市出現恐慌性拋售，出現嚴重嘅骨牌效應。

所謂「黑天鵝事件」，意思係指唔可以預測嘅重大事件。呢啲事罕有發生，但一旦出現，就會具有好大影響力。對於今次嘅杜拜事件，我並唔認同係「黑天鵝事件」。杜拜嘅經濟喺金融海嘯後都無好轉，今年二月時，杜拜政府已經陷入財困，「阿媽」阿聯酋包辦買入200億美元債券，變相注資落去。而且世界島（The World）本應喺○八年底完工，但今年九月項目都差唔多全面停工。投資市場入面資訊咁多，投資者一定要時刻保持住警覺性，千奇唔好放過任何細節，咁樣先可以快人一步認清危機嘅存在。

杜拜事件 震盪有限

執筆之日，阿布扎比（Abu Dhabai）已經表態會「有選擇地」研究點樣幫杜拜，但佢哋亦強調唔會將杜拜全部債務「包底」。相信杜拜事件嘅震盪力會逐步降低，更何況喺香港上市嘅企業對杜拜投資唔多，對企業盈利影響實在有限。

至於投資者係咪可以放心入市呢？我就依然有保留。始終個市由三月升上嚟，都一倍有多，股市進入23,000點之後就係蟹貨區，再加上依家都接近基金年底埋數期，今年嘅表現都夠晒「標青」，大戶無乜理由要喺年底再大力推個市上去，反而不如留番啲水位畀下年仲好，因此個市就算有進一步調整都係合理。