破解人和厚利之謎

每逢踏入新一年，各大財經雜誌都會推介必買股票。而最近喺圖書館無意間翻開《財富》雜誌，發現佢哋揀咗隻人和商業（01387），推介嘅主要原因係人和增長「驚人」。人和○六年盈利只有約5,000萬元（人民幣．下同），但係○八年已經超過20億元，每年複式增長超過十倍；而人和嘅毛利率亦相當驚人，○八年升4.7%去到82.6%。

防空洞變商場好賺
人和嘅大股東係秀麗．好肯，據聞好肯女士曾經做過記者，九四年創立人和，主要業務係喺內地多個城市中心經營防空洞物業投資，收益主要係出售「轉讓經營權」。至於好肯女士點解可以攞到防空洞，並且轉型做地下商場嘅經營權，就無乜人知道啦，只係聽講佢家族擁有軍方背景。

翻查資料，發現人和之所以可以咁賺，原因係內地法律唔將由防空洞改建而成嘅地下商場列入地產範疇內，所以由呢啲地下商場所得嘅租金、轉讓收益同埋買入經營權成本係唔使繳交內地地產相關稅款，加上呢啲由防空洞改建而成嘅地下商場大部分位於市中心，喺內地人均收入同埋租金不斷上升嘅情況下，人和肯定能夠持續賺取豐厚利潤。

打仗隨時要交場
照咁睇，人和咪係明「升」股？咁投資者又諗得過於簡單啦，我就話人和表面風光，但內裏隱藏風險都唔細㗎。首先，人和能夠賺取豐厚利潤係透過內地法律改變所致，假若政府修改法例，人和未必能夠繼續維持。

其次，公司籌集資金成本較高，主要因為由防空洞改建而成嘅地下商場唔屬於內地地產範疇，因此無房產證明文件；而且內地規定一旦處於戰爭時期，呢啲地下商場需要無償向政府交還，因此銀行一般都不會願意接受地下商場作為抵押融資，公司只能透過有限嘅集資渠道融資。

總括而言，投資都係先講保本，然後講回報，想投資人和嘅朋友，一定要留意背後風險。

洪龍荃