專攻龍頭股贏面高

投資市場內，股票數目有如恒河沙數，好多初學投資嘅朋友都想知道應該點樣去挑選適合嘅投資。一般而言，我都會建議大家採用由上而下（Top Down Approach）嘅方法，即係先選擇地區，然後選擇行業，只要行業有前景，先值得我哋再花工夫去收窄範圍，集中火力研究當中嘅龍頭企業。而選擇嘅行業最好先集中喺一啲較為多人熟悉及熱門嘅行業，因為相關嘅公司會提供較全面嘅市場資訊，初學者亦會較容易掌握。

女士愛化妝 莎莎需求穩

仲記得當年自己開始學投資嘅時候，叔叔第一份畀我做嘅功課就係研究本地零售股嘅投資價值，主要係因為行業性質較為簡單，亦都唔難做實地考察。

當時，香港嘅經濟先開始响沙士嘅黑暗歲月恢復過來，經過我實地考察之後，我發現市面上大部分零售股嘅生意都一般，唯獨係賣化妝品嘅莎莎（00178）表現異常突出，每次我經過莎莎店舖，總係發現入面有眾多女士喺度選購化妝品，而且好大部分係從內地過來。經過一輪明查暗訪之後，我發現化妝品零售股絕對值得深入研究，首先化妝品銷售相對穩定，因為女士們無論身處於任何經濟環境內，都會願意使錢去保養或修飾「花容月貌」，宏觀因素影響度較低；另外，佢哋能受惠內地開放個人遊，不少內地同胞都鍾意喺香港買化妝品，主要原因係覺得貨真價實有保證。

當我了解完公司嘅舖位地點、產品定價、目標顧客、員工服務態度等有用資料後，我再喺年報之中找出一啲有用數據，譬如工資及舖租佔經營成本嘅份額、存貨周轉日數、同店銷售表現，以了解公司的成本結構、貨物輪轉速度及同一店舖在不同時期嘅營業額表現，最後先向叔叔正式發表「買入」建議。

或者你睇到呢度，會覺得要成功分析零售股嘅價值都唔係一件易事。我只可以講喺投資世界裏面，分析方法絕對需要經過時間去磨練，正所謂「力不到不為財」嘛。