細睇報表 透視企業營運

今時今日買賣股票，真係唔可以單單睇市盈率、每股盈利、息率幾個數據。世間上有啲公司嘅帳目糊裏糊塗，投資者睇少一眼都隨時「中招」。所以要成為精明嘅投資者，我哋一定唔可以放過公司嘅帳目。喺上市公司嘅年報之中，公司嘅帳目（包括附註）一般都最少佔五成篇幅以上。而每家公司嘅帳目都會分別以三份財務報表去表達，即係損益表、資產負債表及現金流量表。每個報表都有一定嘅作用，投資者要用「金睛火眼」去研讀，先可以對企業嘅業務及財務狀況有一個較為全面嘅了解。

三大報表各有功用

有投資前輩講過：「公司就好似一個三角形立體金字塔，由三個『平面』組成，如果淨係睇一個表嘅話，你等於只係睇到企業嘅一個平面，因此投資者必須從三個角度去睇三個平面，先可以睇到企業嘅全貌。」

大家唔需要太驚呢三個報表，我覺得大家只要識得加減乘除，加埋些少鍛煉，就可以輕輕鬆鬆KO盤數。簡單而言，如果我哋想知公司賺唔賺到錢，我哋應該睇損益表。「損」就是指「虧損」、「益」就是指「賺錢」；通常公司一年的營業額都喺損益表嘅頂部，所以叫做top line，同最低一行嘅全年純利嘅bottomline相對稱。其次，如果我哋想知公司到底有幾多資產及負債，我哋就應該睇資產負債表。至於最後要睇嘅就係現金流量報表，分別從營業活動，投資活動和融資活動三個角度去窺探公司嘅現金流動狀況。

投資新手除咗要學分析唔同行業嘅基本方法與考慮因素外，更加需要了解基本嘅會計語言，否則就好容易被「化妝高手」蒙騙。新年就到，我預祝大家虎年行大運！心想事成！身體健康！