相信每一位打工仔都有諗過退休問題，即使身邊未畢業嘅同學仔都會經常提起退休，始終現代人講求生活質素，無人想打工打成世，反而想早些退休，更多時間做自己想做嘅事。不過，要妥善安排退休絕非容易，因為物價一般會隨時間上升，加上未來難以猜測，譬如金融危機、個人健康問題等等，大家難免都會擔心手上擁有嘅資金是否足夠將來使用。
其實社會上嘅退休計劃都缺乏周詳資訊，好多時淨係粗略估計個退休年齡，而從來冇諗過自己要擁有幾多資產才可以「安全」退休，到最後佢哋會因為缺乏計劃而工作到退休年齡，都唔敢真正退落嚟。
管理費蠶食回報
讀者朋友可能會話：「香港現時有強積金嘛！市民可以唔使擔心退休之後無錢使！」我覺得政府強積金計劃，出發點絕對是為市民着想。不過，實際情況係強積金對市民嘅幫助極為有限。當我哋仔細研究強積金嘅投資組合時，你會突然發現每年收管理費用的投資經理，買入股票都係大家耳熟能詳嘅藍籌股，結果係強積金投資回報喺扣除費用後大縮水，計劃並唔能夠幫到供款者為資產產生豐厚回報。因此退休計劃宜包括其它投資類型。
Facebook 個人專頁 - 請按此連結
沒有留言:
發佈留言