國策扶持 龍源看俏

今個學期我喺中大揀咗科中國商業（China Business）讀，課程內容主要係圍繞住中國企業嘅經營模式及策略，教授要求我哋同學仔要分組做Project，要喺一間正處於朝陽行業嘅公司作深入分析及研究。我嗰組就揀咗隻新能源風力發電股龍源電力（00916），集團係內地風電公司龍頭，以二○○八年底嘅風電總裝機容量計，龍源喺中國與亞太區均位列第一，期內風電總裝機容量分別佔中國、亞太區和全球風電總裝機容量約24.1%、11.1%及2.4%。公司目前營運同埋在建嘅風電項目主要分布喺中國六大區域，而除了風電業務外，龍源亦在江蘇經營兩個火電廠。

眾所周知，投資中國首重政策，隨着低碳經濟概念興起，風電已經成為政府重點扶持產業。中國政府早已表明，支持發展可再生能源，二○○九年再生能源佔中國能源消費比重約8.3%，按照政府規劃，到二○二○年，可再生能源將佔中國能源消費比重約15%。

目前風電佔全國總發電量不足1%，遠遠落後於歐、美等國家。而事實上，中國風能資源非常豐富，估計內地可開發裝機容量達100萬兆瓦，而截至去年底止，全國累及風力裝機容量只有約2.6萬兆瓦左右，反映內地風能未來發展空間極大。

資助風場 增電企收入

風電產業主要可以分為風電營運及風電設備製造兩個環節，而龍源嘅業務就係前者。為鼓勵風電發展，政府給予風電營運公司多項優惠政策，包括：1） 強制性並網及100%電量收購、2）上網電價溢價、3）稅項優惠 （增值稅享有50%退還、風電項目前三年免徵中國所得稅，之後三年減半徵收）。除優惠政策外，財政部更會給予企業直接補貼。另外，風電企業更加可以透過電廠清潔發展機制（CDM），向聯合國氣候變化組織取得資助，每個風場50兆瓦發電量可換取10萬噸排碳權，而每噸排碳權售價約12歐元，將有助增加電企收入。

篇幅所限，下期將繼續論述龍源點解係明日之「升」!（待續）