高鐵威脅大 南航難「起飛」

雖然Semester 1都淨係過左一半，成班同學已經開始討論緊放聖誕假嗰陣可以去邊到玩。大家都話要好好珍惜時間，把握機會同埋D朋友去下旅行，留低個寶貴回憶。而其中一個短線旅遊熱點就係日本，畢竟日本多嘢買同多嘢玩。

講開日本，我最近就喺報紙上見到有關日本航空公司（JAL）嘅消息，宜家日航開始同官民合資的「企業再生支援機構」（ETIC）進行初步磋商，尋求重組業務。其實日航已經連續4年錄得虧損，喺過去10年亦都3次獲得前任政府資助，主要問題係日航有龐大嘅退休金開支，同埋面對住子彈火車嘅強大競爭。去過日本嘅朋友都話，日本嘅鐵路網絡非常方便，計番時間(包括辦理登機手續及候機時間)同埋價錢，搭子彈火車仲好過搭飛機，唔怪得知日航生意咁難做啦!

睇番中國，舊年年底公布嘅4萬億刺激經濟方案，基礎設施佔左主要部分，其中鐵路嘅投資更係重中之重。南方航空董事長司獻民啱啱係北京的一個行業大會上公開話，提高中國全國嘅高鐵網絡將嚴重打擊航空業，他希望政府能提供減稅優惠去協助航空公司減機票票價嚟同高鐵競爭。睇番目前南航一百六十條國內航線中，有三十八條與高鐵存在競爭；再從航空公司收入比例觀察，南航受高鐵影響確實係最大，上半年國內客運收入佔整體客運收入高達85.5%；國航同東航嘅相關收入比重都係6成至7成左右。最弊嘅係盛傳高鐵票價會比起機票平成一半有多，唔怪得南方航空D管理層咁緊張啦!

想投資航空股嘅朋友，就要小心留意內地航空業嘅進一步發展，如果政府唔出招幫下航空股，睇嚟佢地嘅股價都好難再「起飛」，隨時變做「夕陽股」，同日航落得相同命運。