搭的士尋找投資機會

以往去旅行，大都會同屋企人選擇跟旅行團，最主要原因係貪方便。人大咗多咗機會同「老友」去旅行，話晒大家都係後生仔，一般都會選擇「自由行」，因為自由度大之餘，仲可以體驗當地嘅風土人情。

我經常話：「投資機會總係响我哋身邊，關鍵係視乎我哋有冇細心留意同埋發掘。」對於投資者而言，「自由行」絕對可以幫到你發掘唔少良機。好多時候，我哋身處外地，少不免都會搭「的士」travel吓，的士司機絕對係一個好好嘅訪問對象。一方面佢哋揸車經常周圍去，對整個城市發展情況會有概括了解；另一方面，佢哋會經常接載唔同嘅乘客，當中好有可能不乏商人、投資者等，佢哋有機會預先知道未來城市嘅發展情況。

三農概念有迹可尋

眾所周知，依家中央政府嘅財政及經濟政策向「三農」大幅度傾斜，好多同「三農」有關嘅農業及家用電器公司股價及盈利都大幅上升。過往，農村嘅經濟狀況遠比城市差，大量農民紛紛選擇移居城市，尋求更好嘅發展機會。不過，時移勢易，响中央政府協調下，農民嘅經濟狀況已有改善。呢段時間，我哋都唔難聽到以下消息，珠三角地區工廠極難招請外省民工，請一個普通工人好可能最少要1,800元人民幣，但依然仲請唔到人，因為不少農民現時在農村都可能每月賺到大約2,000元人民幣，根本唔需要出城市打工。其實農村經濟起飛嘅消息，我舊年到內地旅行嘅時候已經由一位司機大哥口中聽過，只不過嗰陣時聽完冇咗件事，如果唔係就可以快人一步投資有關「三農」嘅股票啦。

投資機會係可以透過不同方面發掘，但請記得做任何投資決定前都要先收集資料，再作多方面了解，切忌盲目盡信任何一方意見。

誰是Uncle Sam?

美國國會在一九六一年認定Uncle Sam（山姆叔叔）為美國民族象徵，現在多指美國政府，常見於外國財經報道。Uncle Sam為軍隊的肉類供應商，第二次世界大戰時，以Uncle Sam的造型製作呼召士兵的海報，令他的形象廣泛流傳。