嚴選新股六部曲

最近上市嘅新股真係多到數唔晒，好多時根本唔能夠逐一睇晒佢哋嘅招股書，我淨係會集中留意一啲集資額較大同埋知名度較高嘅公司。講到抽新股，好多朋友都會覺得抽新股風險唔大，值博率高，抽中隨時一日就賺幾成，認真和味！但我認為佢哋淨係睇到好嘅一面，因為市場上都有唔少新股上市之後，股價無乜起色，慢慢做咗「潛水艇」，所以投資者抽新股之前最好都係做足功課。

太保有賣點可留意

綜合我多年抽新股心得，我總結咗「選股六部曲」，今日就藉呢個機會分享畀大家。第一步，睇公司的集資用途，因為有啲公司上市嘅目的只係為咗快速套現，大股東完全唔理公司前景，如果大家亂咁認購嘅話，相信最終結局都係等「坐艇」。第二步，睇公司本身的行業及業務，了解各項利好及利淡的因素。第三步，睇保薦人的質素和實力，喺認購新股前，必須要認清背後「保薦人」，一啲信譽較好、規模較大嘅保薦人，的確可以作為入市指標。第四步，睇上市定價，大家要細心比較新股同其他同類公司嘅市盈率、盈利預測及負債比率等元素，再衡量係咪應該投資。第五步，睇吓有冇基礎投資者入股，當然大家都要睇吓基礎投資者嘅背景，如果佢哋來頭唔細嘅話，好可能都跟得過。第六步，睇市場氣氛，如果新股上市時投資氣氛唔好，大家最好都係忍手唔好認購，因為呢啲股份嘅上市表現通常都「好極有限」。

睇番嚟緊即將上市嘅新股當中，我對太平洋保險（02601）都有興趣，始終依家中資保險股選擇唔多，加上國民日益富裕嘅情況下，保險市場仲有好大嘅增長空間，所以太保都有賣點，大家不妨留意吓啦。