尋找Nike影子股

「Just Do It」、「Impossible is Nothing」呢啲宣傳口號，相信大家都見慣見熟。唔少大學生都係Nike嘅「粉絲」，而我就係Nike Air Force系列嘅忠實擁躉，咁多年買完一對又一對。講起Nike呢個牌子，大把人比我在行；但講起生產模式，可能就有好多人唔係咁清楚啦。

唔講唔知，貴為全球運動產品商「一哥」嘅Nike，原來一間生產工廠都冇，亦幾乎冇一間舖頭，但係就可以每年創造到高達180億美元嘅銷售額。Nike主力係放喺產品研發同埋設計上面，其他生產程序全部外判，生產商主要集中喺內地、越南、馬來西亞及泰國，呢四個國家分別生產Nike鞋類產品的36%、33%、21%及9%。而服裝生產商就有34間，主要亦都係集中喺發展中國家。最勁係佢連分銷都外判埋，基本上只有1%店舖係自己經營。

Nike呢種經營模式可以大幅減省成本，因為公司唔使負擔生產效率、存貨、零售管理等業務，於是公司團隊就可以專注於宣傳同埋品牌發展上。

中國動向拓網民市場

喺香港上市嘅體育用品股中，中國動向（03818）同Nike嘅經營模式都好類似。中國動向擁有Kappa嘅內地特許使用權，但淨係集中喺產品研發同埋品牌管理上，其他範疇全部外判。不過Kappa嘅定位，其實比Nike更加靈活，因為運動衫都有分專業同埋潮流兩種，Nike行專業路線，而Kappa就專注潮流路線。據講，公司自九月開始仲同淘寶網合作，將營銷渠道拓展到年輕嘅網民，認真有計! 中國動向手持現金高達69億元，來年訂貨增長理想，又「食正」內需概念，「錢」景唔錯。