波司登轉型有遠見

一星期前，天文台日日都掛「寒冷天氣警報」，出去拜年時都要着住件厚厚嘅羽絨褸。雖然寒流已過，但係我都想喺今期專欄同各位讀者介紹一間專注於羽絨服生意嘅公司波司登（03998）。佢喺○七年十月中旬上市，只係之後咁啱遇上大跌市，股價輾轉回落唔少。


實際上，波司登喺內地經營羽絨服嘅開發及管理非常出名，根據中國行業企業信息發布中心及中國國家統計局統計數據，波司登由九五年開始已經連續十四年成為國內羽絨服行業第一品牌；○八年度，集團品牌組合（包括「波司登」、「雪中飛」、「康博」及「冰潔」）嘅總市場份額高達39.5%。

市盈率低 攻守皆宜

要完善分析一隻股票，投資者絕對需要留意公司嘅核心競爭力同埋管理層質素。波司登擁有強勁嘅核心競爭力，譬如公司近年將羽絨服設計加入潮流及時尚元素，將羽絨服嘅設計「時裝化」及「輕身化」之餘，仲不斷引入新物料科技。另一方面，集團主席高德康喺行內經驗豐富，同埋最重要係擁有前瞻性。現在全世界都講緊溫室效應，地球會愈來愈熱，波司登早知道長遠繼續做羽絨服只會「等死」，不如趁仲有時間，盡快將業務轉型。公司喺○八年都開始率先推出服裝，而今年更進軍男性服裝市場，仲計劃喺今年拓展500家終端店舖。
喺一眾內需股之中，波司登接近屬於內地市盈率最低嘅公司，我相信估值絕對有上調的空間，加上現價計算息率都有接近8厘，都可以講得上係一間可攻可守嘅公司。

何謂春江鴨？

股壇春江鴨指的是收到內幕消息的人，他們在收到消息後，一般會馬上作出決定，進行買入沽出，比一般投資者早一步作出行動，獲利更豐富。然而春江鴨若涉及內幕交易，屬違法行為。