2010年2月6日星期六

揀內房股慎防政策風險

呢兩個星期,父母都忙於穿梭香港與內地,為的就係要辦理好內地間屋嘅收樓手續。其實,爸爸早於四、五年前已經睇好內地嘅房地產市場,佢預期經濟急速發展及人民幣持續升值下,樓價大方向都會向上,情況就好似八十年代中期嘅香港。於是就喺兩年前一個合適嘅機會下,爸爸亦首次投資內地房地產,為我哋屋企人買番間擁有無敵海景嘅「Dream House」。

雖然中央政府近月推出咗一連串調控樓市嘅措施,即包括「國四條」、「國十一條」等,諗住為樓市降降溫,而一線城市如北京等地嘅一月份二手交投亦急跌七成。由於我哋間屋並唔係位處於一線城市,所以樓價都無受近期出台嘅房地產調控影響,樓價反而相對買入價仲略有升幅添。

我除咗鍾情中資金融股之外,都有用啲時間研究吓內房股。以往揀內房股,我一般都會先睇股價相對資產淨值(NAV)折讓、毛利率、負債比率、土地儲備及銷售入帳時間等資料。而喺過往幾年人民幣持續升值及資產價格急升情況下,持有較多土地儲備嘅公司一般都較為「着數」,因為佢哋唔使急於同其他公司爭買貴地,反而仲可以較低地價起樓,繼而賺番個靚價錢。

土儲過多適得其反

但投資世界日新月異,尤其是投資中國,政策風險不可不防。今時今日揀內房股再唔可以齋揀土儲多嘅企業,因為土儲過多好可能係負累,中央早前才向部分房地產企業徵收圈地、囤地罰款。一線城市樓價偏高,有興趣投資內房股嘅朋友不妨選擇一些業務為處於二、三線城市嘅企業,相信佢哋受到政策打壓嘅風險較細,同埋可以享受到農民入城(城鎮化政策)嘅支持因素。

3 則留言:

匿名 說...

嗯~
雖然中央出手打壓,不過都唔係要個樓市死,
只係唔比佢行得太快姐~
現在北京,上海,地王頻頻出現,反映供求仍然大,加上上年內房股大部份都可以完全銷售目標,其實大陸樓市真係仲未見頂~
Joseph

匿名 說...

Larry,halo~有無興趣出一本電子書增加你的名氣同收入呀?我係maketing出身,我諗到條橋可以幫你出本電子書,當然是完全免費,之後賺到的錢同你平分,ok?你只需要收集你的文章(50pages以上就ok),然後我幫你製作電子書(三天內做好),由我一手包辦,然後擺上我的網站售賣:www.ahhahk.com,有興趣send email到mkt@ahhahk.com比我呀~

Larry 洪龍荃 說...

Joseph,

我也覺得內地樓價還有上升的空間,不過現在中央出手控制泡沫絕對是好事,畢竟土地及房價對國家的穩定影響很大。