2009年11月3日星期二

用買樓概念選落後股

近期,最多人茶餘飯後討論嘅問題必然係「樓市」,恒基旗下干德道「天匯」項目,每平方呎賣到成7萬幾蚊,香港豪宅市場已經由內地熱錢支配,內地同胞唔怕「買貴」,最怕嗰樓盤唔夠「豪」。睇番樓價,由舊年雷曼爆煲嗰日開始計,金融海嘯過左一年多D,樓價已經差唔多返到海嘯之前嘅高位,身邊唔少廿歲附近嘅朋友都話樓價咁貴,畢業之後都唔知要等到幾時先儲到首期,享受下做業主嘅滋味喎。

而特首最近亦都被問到樓價係咪過高,佢即刻話:「豪宅售價上升唔會影響一般樓宇價格,普通市民唔使太過擔心。」特首呢嗰講法,邏輯上絕對無錯,不過佢就忽略左資產價格存在住相對價值(Relative Valuation)嘅問題。

舉個例,假如你原先放盤賣一個700呎嘅單位,每呎賣5000蚊,掛盤350萬。點知屋企附近最近啱啱起左個豪宅項目,每平方呎賣到成2、3萬幾蚊,一個700呎嘅單位埋單計數最少要幾千萬。你估你收到風之後,會唔會即刻打比個代理話要加價賣盤? 我估計大部分人都會加價,因為你放盤嘅時候都會參考下同區樓盤嘅售價,假如其他樓盤嘅價錢升左,你會覺得自己個盤都要加價,唔係嘅話相對上就好似賣平左。

將相對價值套番落投資市場其實一樣用得着,好多時同一個行業內會有幾間公司上市,假如龍頭股預先上升,大家不妨留意下佢其他同行,睇下佢地嘅股價有冇變動,如果冇特別升幅嘅話,可能係一個良好的買入機會,因為佢地嘅股價理應上升,相對價值應受惠龍頭股的估值上揚。

1 則留言:

kin man 說...

我有睇你個blog呀﹗好正呀﹗我覺得你既睇法同你既年齡並不附合﹗看得出你有多年既歷練﹗有自己一套既看法﹗同埋想問下要點樣學先可以好似你咁架﹗入門可以睇啲咩書呀﹖ (P.S.我有睇你本書呀﹗而家日日都有睇經濟日報,但係邊part最值得睇呀﹖)