2009年11月21日星期六

一手資料助奪先機

每逢到了十一月份,讀中大英文系嘅同學都會好忙,因為呢個月係交Paper嘅「旺季」。雖然英文系大部分course都唔會有Mid-Term Exam,但係寫Paper嘅工作量都唔輕。當我哋正式落筆前,同學都會先去圖書館搵書或者上網搵資料,好多時每一科最少都借10本、8本書,要花唔少時間去消化。

講起搵料,好多人都唔係咁識分咩係一手資料,咩係二手資料。簡單嚟講,同事件相關嘅或當事人提供嘅資料,統稱為一手資料;經第三者整理而得出嘅資料,就叫做二手資料。

喺投資世界入面,各種唔同嘅傳播媒體,包括報紙、雜誌、電視台等都會有專家喺度對股市或者個別公司作出評論;而且每間上市公司亦都要定期發布營運狀況同埋業績報告。呢啲資料全部被歸類為二手資料,雖然都有一定參考價值,但係唔夠Updated。

就以業績報告為例,上市公司公布嘅資料都係過去半年或者一年嘅情況,某程度上反映唔到公司嘅最新情況,再加上呢啲資料唾手可得,預測價值一啲都唔高。

投資者除咗要參考二手資料外,最重要係學識點樣去搵一手資料;要有第一手資料,先可以做出最好嘅決策。其實搵一手資料並唔難,最簡單嘅方法可以留意吓報紙上面嘅招聘廣告,如果你見到某某公司話要請人,你就可以分析吓究竟係公司嘅業務蒸蒸日上,定係內部出現問題,員工流失問題嚴重。

大家又或者可以多啲留意吓世界各地所發生嘅大事,研究吓當中與投資市場之間嘅關係,快人一步作出投資決定,早奪先機。

沒有留言: