2010年1月9日星期六

企業生命周期搵潛力股

相信讀過經濟學嘅朋友都應該記得咩嘢係商業周期(Business Cycle),意思係話一般經濟都會依循擴張、頂峰、收縮、低谷等循環去運行,而每個周期內嘅經濟情況及活動都會唔同。最近,我就睇咗一本類似嘅書,內容係講述企業生命周期,佢指出每個行業、每種生意及產品與人嘅壽命一樣,都係具有生命周期,一般可以簡單分為(1)初始發展、(2)高速增長、(3)成熟穩定、(4)老化式微共四個階段。

如果將有關理論套用於投資上,我哋會發現一啲位於初始發展階段嘅公司都係較少人留意或者業績較差,原因好可能係佢哋需要投放大量金錢去投資新技術或者開發市場,市場給予這些公司嘅估值都會較低。但一旦這些公司踏入高速增長階段,佢哋嘅業績就會快速改善,財務數據亦會持續向好,市場給予這些公司嘅估值都會較高。

隨着這些公司再進一步發展,佢哋會慢慢步入成熟穩定階段,佢哋嘅增長會放慢或與經濟發展同步,但係由於佢哋現金流充足及派息穩定,市場給予這些公司嘅估值一般與整體大市同步。最後,當公司從成熟穩定階段步入老化式微階段,即係所謂變成夕陽工業,佢哋嘅業績便會開始倒退,財務數據亦會持續惡化,市場所給予這類公司嘅估值一般會較低。

步入高增長 回報爆升

投資者要從企業生命周期去找出商機,最好係專門搵一啲即將由初始發展步入高速增長階段兼且擁有巨大潛力嘅公司,投資於這類公司嘅風險唔高,但回報卻可能係數以百倍,真可謂「一本萬利」! 近年嚟,最佳嘅例子就係騰訊,騰訊憑着社交軟件QQ及網絡遊戲迅速走紅,股價從上市至今上升超過四十倍。
想搵下一間騰訊?咁就要考考大家眼光啦,不過最重要都係多啲留意新聞及觀察身邊事物。

何謂法定貨幣?

法定貨幣(Legal Tender)即是該國或地區必須接受的貨幣,人民幣在香港雖然很普遍,但絕對不是法定貨幣,商戶等不一定接受港元以外的貨幣。
洪龍荃

沒有留言: