2010年1月23日星期六

價值投資易學難精

記得自己開始學投資嗰陣,叔叔畀我睇嘅第一本書就係有關股神巴菲特嘅投資心法,嗰時我初步接觸到「價值投資」。其後,隨着年紀長大,我再慢慢接觸被廣大人士喻為投資界「聖經」嘅《證券分析》,雖然本書都幾厚,加上啲資料數據已經過時,但仍然非常值得投資者再三閱讀,因為佢可以幫你更深入去思考到「價值投資」的精髓。

《證券分析》作者格拉罕( Ben Graham)被喻為價值投資之父,佢事業處於高峰嘅時候正值美國大蕭條時期,當時經濟非常疲弱,處於通縮年代。佢當時提出投資者應該找尋股價對帳面值存在折讓嘅投資,如果喺市場上面搵到一家公司零負債、而股價仲低過淨流動資產(流動資產減總負債),咁呢家公司就九成買得過,而最後剩低嘅一成就係要睇埋管理層誠信及能力。

巴菲特信奉 揀高增長股

至於佢徒弟巴菲特嘅諗法就有啲唔同啦,巴菲特主張投資者要先篩選上市超過五年、市盈率在二十倍以下、有穩定派息同埋業務能持續增長嘅公司,然後再從中選擇股本回報率及營業額增長率最高嘅股份。

一直以來,我都覺得「價值投資」係易學難精,對於佢表面上嘅定義,人們都清楚係要找尋股價相對於估值存在折讓嘅投資,但實際上點樣去釐定、點樣去訂立選擇準則等因素先至係重點所在。估值係一門藝術,唔同嘅價值投資者都應該有個人嘅一套估值標準。以我為例,我傾向對股本回報率高及負債率低嘅公司入手,然後再從中分析個別公司的行業、競爭能力、營運策略等,從而找出合適的投資對象。

最後,我想提醒各位有心成為「價值投資者」的朋友,尋找「真正」價值被低估嘅公司絕對唔係易事,請勿咁易相信市場會經常走漏眼,得你一個人獨具慧眼,好多時候公司股價長期偏低必然存在某些問題,因此除非你已經完全搞清楚公司嘅情況,否則唔好隨便認為「I am right! Market is wrong!」

沒有留言: